එම පක්ෂයේ මන්ත්‍රී ලක්ෂ්මන් කිරිඇල්ල මහතා පැවසුවේ, දින 14 ක් සඳහා පමණක් අදාළ පත් කිරීම කරන බවට මීට පෙර දැනුම් දී තිබූ බවය.

එහෙත්, යළිත් එම කාලය දින 14 කින් දීර්ඝ කිරීමට අදාළව එවා ඇති ලිපිය, සභාවට ඉදිරිපත් කරන ලෙස මන්ත්‍රීවරයා මූලාසනයට දැනුම් දුන්නේය.

මෙහිදී කථානායක වි.ජ.මු. ලොකුබණ්ඩාර මහතා පැවසුවේ, එලෙස ලිපියේ සඳහන් කරුණු සභාවට හෙළි කිරීමේ පූර්වාදර්ශයක් නැති බවය.

හිටපු මහ ලේකම් ප්‍රියානි විජේසේකර මහත්මියගේ ද මෙලෙස දින 14 ක කාලයකට පත් කිරීම දීර්ඝ කළ බව ද කථානායකවරයා පැවසීය.

මෙහිදී, ලක්ෂ්මන් කිරිඇල්ල මහතා පැවසුවේ, ප්‍රියානි විජේසේකර මහත්මියගේ එවක පත් වීම ව්‍යවස්ථාදායක සභාවේ අනුමැතිය මත සිදු වූවක් බවය.

කෙසේ වෙතත්, මේ තත්ත්වය පිළිබඳව පක්ෂ නායකයින් සමග සාකච්ඡා කර විසඳුමක් ගත යුතු බව විපක්ෂ නායක රනිල් වික්‍රමසිංහ මහතා මෙහිදී ප්‍රකාශ කළේය.