පෙබ.09 - පාර්ලිමේන්තු මන්ත්‍රී ශ්‍රීපති සූරියාරච්චි මහතා රැගත් මෝටර් රථය අනතුරට ලක්වීමට හේතුව අධික වේගය බව වයඹ ප්‍රදේශය භාර නියෝජ්‍ය පොලිස්පති ජයන්ත ජයසිංහ මහතා පවසයි.

ශ්‍රීපති සූරියාරච්චි මහතා අද දහවල් අනතුරට ලක්වූයේ කොළඹ බලා එමින් සිටියදීය.
සූරියාරච්චි මහතා රැගෙන අනුරාධපුරයේ සිට කොළඹ බලා ධාවනය වෙමින් තිබූ මෝටර් රථය අද දහවල් 1.15 ට පමණ අනුරාධපුර - කුරුණෑගල මාර්ගයේ මැදගම ප්‍රදේශයේදී අනතුරට ලක්විය.

අනතුරේදී ශ්‍රීපති සූරියාරච්චි මහතාගේ ආරක්‍ෂකයින් දෙදෙනෙකුද මිය ගිය අතර, තඹුත්තේගම රෝහලේ දිස්ත්‍රික් වෛද්‍ය නිලධාරීවරයා පැවසුවේ රෝහලට ඇතුළත් කරන විටත් සූරියාරච්චි මහතා මිය ගොස් සිටි බවය.

1962 සැප්තැම්බර් මස 8 වැනිදා උපත ලැබූ සූරියආරච්චි මහතා වෘත්තියෙන් නීතිඥවරයෙකි. ඔහු පාර්ලිමේන්තුවට තේරී පත්වුනේ ගම්පහ දිස්ත්‍රික්කයෙනි.
එක්සත් ජනතා නිදහස් සන්ධාන රජයේ අමාත්‍යවරයෙකු ලෙස ද ක්‍රියා කළ ශ්‍රීපති සූරියාරච්චි මහතා පසුව ශ්‍රී ලංකා නිදහස් පක්ෂයේ මහජන පාර්ශ්වය සමග සන්ධාන ගතවූයේ එම පක්ෂයේ සම්බන්ධීකාරකවරයා ද වෙමිනි.