මෙම සංගමය කටුනායක අපනයන ප්‍රවර්ධන කළාපය තුළ සේවය කරන තොරතුරු තාක්ෂණ වෘත්තිකයන් ගෙන් සමන්විතය.

කටුනායක අපනයන ප්‍රවර්ධන කලාපය තුළ හා ඒ අවට සිටින තොරතුරු තාක්ෂණ අංශයෙන් ඉදිරියට යාමට කැමති පුද්ගලයින් සඳහා සහය වීම මෙම තොරතුරු තාක්ෂණ වෘත්තිකයන්ගේ සංගමයේ ප්‍රධාන අරමුණය.

විශේෂයෙන්ම කලාපයේ කර්මාන්තශාලා ආශ්‍රිතව සේවය කරන සේවක සේවිකාවන් ගේ පරිගණක දැනුම වැඩි කිරීමට විවිධ වැඩසටහන් ක්‍රියාත්මක කිරීම ඒ අතරින් ප්‍රමුඛ වේ.

ගතවූ වසරක කාලය තුළ තොරතුරු තාක්ෂණ අංශයෙන් ඉදිරියට යාමට කැමති පිරිස් ඉලක්ක කර ගනිමින් විවිධ සම්මන්ත්‍රණ හා වැඩමුළු රැසක් කටුනායක අපනයන ප්‍රවර්ධන කලාපය තුළ ක්‍රියාත්මක කිරීමට තොරතුරු තාක්ෂණ වෘත්තිකයන්ගේ සංගමයට හැකි විය.

මෙම වැඩකටයුතු වඩාත් පුළුල් කිරීම සඳහා කටුනායක අපනයන ප්‍රවර්ධන කළාපය තුළ පරිගණක පුහුණු මධ්‍යස්ථානයක් සහ පරිගණක පුහුණු විද්‍යාගාරයක් ස්ථාපිත කිරීමට ඔවුහු අපේක්ෂා කරති.

එමගින් කටුනායක අපනයන ප්‍රවර්ධන කලාපය තුළ හා ඒ අවට සේවය කරන පරිගණක පුහුණුව ලැබීමට කැමති සේවක සේවිකාවන්ට ඒ සඳහා අවස්ථාවක් සැලසීම එම සංගමයේ බලාපොරොත්තුව වේ.

ඒ සඳහා අරමුදල් රැස් කිරීමටත් තම සංගමයේ පළමු සංවත්සරය සැමරීමටත් "ඉන්ෆොටෙක් නයිට් 2008" නමින් සුහද හමුවක් සහ අරමුදල් රැස් කිරීමේ වැඩසටහනක් තොරතුරු තාක්ෂණ වෘත්තිකයන්ගේ සංගමය සංවිධානය කර ඇත.

2008 නොවැම්බර් මස 15වන දින සීදූව, ටාජ්-එයාර්පෝට් හෝටලයේදී පැවැත්වෙන හමුවේදී රැස් කෙරෙන මුදලින් වැඩි කොටසක් පරිගණක පුහුණු මධ්‍යස්ථානය ගොඩ නැගීමට යෙදවීමට තොරතුරු තාක්ෂණ වෘත්තිකයන්ගේ සංගමයේ තීරණය කර ඇත.

ඊට අමතරව ඉදිරියේදී තොරතුරු තාක්ෂණික දැනුම ලබා දීමේ අධ්‍යාපනික වැඩසටහන්, සම්මන්ත්‍රණ, වැඩමුළු රැසක් කටුනායක අපනයන ප්‍රවර්ධන කලාපය තුළ දියත් කිරීමට ද තොරතුරු තාක්ෂණ වෘත්තිකයන්ගේ සංගමය අපේක්ෂා කරයි.